【高明邏輯】科技股的最大敵人(第183期)

—新朋友請點上方”港股策略王”關注我們—

【高明邏輯】科技股的最大敵人(第183期)

分析員、基金經理、財演唔會話你知嘅科技股真相。科技股最大敵人,係時間。
回顧歷史,每個年代都有唔同嘅「創新科技公司」,400年前嘅創新科技,就係大航海時代,比起其他年代創新科技更有標誌性,因為當年「發現新大陸」,成為往後所有科技公司嘅目標。
及後嘅「破壞性創造」,要數愛迪生公司發明燈泡,令無數蠟燭廠倒閉。歷史巨輪不斷在轉:汽車、電視、天線、航空、家電、甚至國際銀行,都曾經成為創新一員,喺股市衝浪。
坊間分析員唔會用歷史角度去對待科技股,亦導致佢哋覺得科技股真係好科技好勁。
事實上,殺死「創新科技」嘅,就係時間,好多科技股,喺發明一刻當然被大眾認為係高科技,但今年係咁,出年又係咁,後年已經唔覺佢有幾「新」。
科技股為托估值,好鍾意用好多數字同口號去支持高估值合理,例如亞馬遜,高明係亞馬遜用家,不論佢宣揚自己背後有幾自動化幾勁,或者每年投放幾多入研發,其實生意模式同最初賣書分別唔大,只係賣埋一般產品、電影同雲端服務,對消費者嚟講分別唔明顯,又係老問題:第一年覺得好新好勁;第二年覺得好勁;第三年已覺得好平常。
騰訊(700)被當科技股則更不幸,因為一睇盤數,就知佢係內容股,主業係賣遊戲。
其他所謂共享,例如Uber、airbnb同共享單車就更搞笑,只係租車網、租房網、租單車網,第一年可能覺得得意,今日一睇都知唔係創新科技啦!掛起「共享」旗幟但又將風險轉嫁晒落用戶度,根本冇共享過,投落呢啲企業嘅基金,間嘢仲未上市套現都只能祝佢好運。
好多嘢,今年係新,出年就會變舊,今浪好多所謂創新全部依靠手機,但手機已由科技變成必需品,其他副產品已不能再用科技自居。東印度公司如果留到今日只係航運股,汽車飛機全部變晒工業股,呢類科技股最合理嘅演變,就會成零售股。
就好似一段戀情,最初無限憧憬、如詩如畫,但最後必然變作細水長流,又或老死不相往來。

=================================
揭頁版電子書同步上架,即刻Click入以下網址收看
http://subscription.winmoney.hk/
=================================
《港股策略王》手機APP
iOS:https://appsto.re/hk/ysXocb.i
Android:https://play.google.com/store/apps/details?id=com.megahub.winmoney
#港股策略王#手機app #更新#你今日下載咗未
掃一掃QRCode(二維碼)馬上關注”港股策略王”

为您推荐

发表评论

邮箱地址不会被公开。 必填项已用*标注